ما هي محركات البحث Search Engines ؟ وكيف تعمل تلك المحركات ؟



ما هي محركات البحث ؟

وما هي آلية وطريقة عمل تلك المحركات ؟

ما هي محركات البحث Search Engines ؟ وكيف تعمل تلك المحركات ؟

كان زمان مفيش حاجة اسمها بحث , لكن كان في حاجة اسمها اسم الموقع Domain أو رابط الصفحة URL . يعني ايه ؟ قبل سنة 1990 مكنش في حاجة اسمها محركات بحث Search Engine , فكان لازم تكون عارف اسم الموقع أو النطاق أو الصفحة اللي هتدخل عليها Www.Domain-name.com , وطبعا لو كان في الاسم اى غلط مستحيل تقدر توصل للموقع اللى انت عايزه , أما بقي لو مكنتش عارف اسم الموقع او الصفحة اللي موجود فيها اللي بتبحث عليه فده كان مصيبة , لأنك هتقعد تدخل اسماء ومعاني مقترحة في مكان الـ URL وانت ونصيبك بقي , يا تلاقي يا متلاقيش . وكان اعتماد اصحاب المواقع في إشهار المواقع علي شبكة الإنترنت بيعتمد علي طباعة اسم الموقع Domain علي المطبوعات الورقية أو من خلال التواصل المباشر مع العملاء وإبلاغهم بإسم الموقع للدخول عليه . يعني معني كده أن إشهار المواقع بيقتصر علي المنطقة المحيطة بالشركة أو المعارف الشخصية ؟ اكيد طبعا . بعد كده بدأ ناس كتير تفكر فى موضوع محركات البحث , وفي 1997 انطلق محرك البحث جوجل Google Search Engine عشان يخدم العالم كله ويوفر المعاناه علي الباحثين عبر شبكة الإنترنت . وبالمناسبة في محركات بحث كتيير جدا غير جوجل Google ذي :

أنواع محركات البحث المختلفة

Ask, Aol, Yahoo, Bing, Wow, DuckDuckGo, Wolframalpha, Baidu, Webcrawler, Infospace, Quora, Dogpile, Altavista, Yandex, Mywebsearch, Info ……. طيب ايه هي محركات البحث ؟ تقدر تقول علي محركات البحث أي اسم من الاسماء دي : موقع الكتروني Web Site . برامج Software Programs . نظام برمجيات Software System . ولكن ايه وظيفة محركات البحث وبتشتغل إزاي ؟ خلينا نشرح علي أفضل محرك بحث علي مستوي العالم والأكثر شهرة وإستخداما وهو محرك البحث قوقل أو جوجل Google .

إزاي بيشتغل محرك البحث جوجل ؟ وايه اللي بيقدمه ؟ محرك البحث جوجل له وظيفتين اساسيتين :

الأولي : وهي الزحف Crawling .

عملية الزحف لمحركات البحث على مواقع الويب

طيب مين اللي بيعمل عملية الزحف دي ؟ إنسان ؟ لا طبعا , اللي بيقوم بعملية الزحف أكواد برمجية تسمي عناكب البحث Spiders أو الزواحف Crawlers أو Bots , والعملية دي بيطلق عليها Automated Robots بمعني الإنسان الآلي . بتبدأ العناكب Spiders أو الزواحف Crawlers تبحث وتزحف علي مواقع الويب والصفحات المختلفة الموجودة علي شبكة الإنترنت , وبعد كده بتجمعها كلها في مكان واحد اللي هو فهرس جوجل Google Index أو قاعدة البيانات الخاصة بمحرك البحث جوجل واللي بيحتوي علي مئات المليارات من الصفحات علي ذاكرة تقدر حجمها بأكثر من 100,000,000 جيجا بايت حسب تقرير جوجل . تيجي هنا بقي فايدة الروابط Links في عملية الزحف . الأول يعني ايه الروابط Links ؟ الروابط عبارة عن نص أو صورة لما تضغط عليها بتوديك لصفحة تانية فيها محتوي خاص بالكلمة دي أو بالصورة دي , ذي مثلا لو دخلنا علي أي موقع ولقينا في بداية الموقع كلمة (من نحن) وضغطنا علي الكلمة هتودينا لصفحة تانية بتوصف الموقع أو بتعرفنا علي الشركة , (من نحن) دي بقي إسمها رابط Link . الروابط دي بقي من خلالها بتقدر العناكب Spiders أو الزواحف Crawlers إنها تتعرف علي مليارات الصفحات من خلال تتبعها للصفحات اللي الروابط بتشاور عليها , وتقعد بقي العناكب تزحف وتجمع وتحط في الفهرس , وهكذا . وبعدين .... ؟ هنا بقي ننتقل للوظيفة التانية لمحركات البحث .

الثانية : بناء الفهرس Building an Index أو عملية الفهرسة Indexing أو عملية الترتيب Rank .

كيف تقوم محركات البحث ببناء الفهرس الخاص بها

بعد عملية الزحف Crawling اصبح موجود مليارات الصفحات في فهرس جوجل , وبالتالي لازم يكون في ترتيب وتصنيفات للصفحات دي , يعني العناكب Spiders بتشوف كل صفحة بتتكلم عن ايه وتحط الصفحة في التصنيف الخاص بيها , وبالشكل ده هيكون معانا تصنيفات مالهاش عدد . طيب لو اى حد دخل على موقع جوجل وكتب في مربع البحث ( أي كلمة ) ولنفترض (شركة تسويق الكتروني) اكيد في الآف الصفحات في فهرس جوجل بتتكلم عن (شركة تسويق الكتروني) , طيب ياتري جوجل هيظرهم كلهم ؟ طبعا , لكن مين من الصفحات هيظهر في أول النتائج ومين اللي هيظهر رقم 2 ورقم 3 وهكذا في نتائج البحث . هنا مربط الفرس ....

الأول كانت محركات البحث Search Engines بترتب المواقع والصفحات اللي موجوده في الفهرس الخاص بها حسب توافر الكلمات البحثية أو الدلالية Keywords في الصفحات .

علي سبيل المثال : لما كان حد بيكتب في محركات البحث (خدمات التسويق الالكتروني) , كانت العناكب Spiders بتروح بسرعه للفهرس بتاعها في قسم (خدمات التسويق الالكتروني) وتشوف مين أكتر صفحة موجود فيها الكلمة دي , وبعدين تظهر الصفحات دي بالترتيب في نتائج البحث حسب توافر كلمة البحث فيها . فكان اصحاب المواقع والصفحات بيعملوا ايه ؟ بيقعدوا يكرروا الكلمة البحثية Keyword دي بطريقة تخليك تكره نفسك , فأصبح محرك البحث جوجل بيقدم إجابات وصفحات ومواقع غير مفيدة للباحثين .

من هنا ظهرت حاجة اسمها (خوارزميات Algorithms) جوجل , يعني عوامل بيحددها محرك البحث جوجل عشان يرتب الفهرس بتاعه بشكل يفيد الناس اكتر واكتر , ويظهرلهم نتائج قيمة تفيدهم .

خوارزميات محرك البحث جوجل

بمعني اخر , خوارزميات جوجل هي العوامل التي من خلالها بيقدر يعرف ويقيم محرك البحث ايه افضل الصفحات والمواقع اللي تفيد الباحثين أكتر , وبناءا عليها بيتم ترتيب ظهور المواقع والصفحات في نتائج محرك البحث .

معني كده إن نتائج البحث مش بيتم ترتيبها يدويا , وإن ترتيبها بيتم بناءا علي مئات المتغيرات اللي بتنص عليها الخوارزميات الخاصة بمحرك البحث , واللي هنقول عليها بعد كده (عوامل الترتيب) Ranking Factors واللي بتزيد عن 200 عامل .

اتمني إنكم تكونوا عرفتم ما هي محركات البحث , وازاي الـ Search Engines بتشتغل وبتظهر لنا النتايج .

ايه اللي ممكن نخرج بيه من المقال ده ؟ عرفنا يعني ايه محرك بحث . عرفنا ازاي بيشتغل . وكمان عرفنا إن ظهور أو تصدر نتائج محركات البحث لموقعنا امر مش سهل علي الاطلاق .

يعني أصحاب الشركات اللي قاموا بالفعل بتصميم موقع إلكتروني خاص بيهم وبيقفوا عند كده , احب اقولهم انكم رجعتم 27 سنة لورا , يالا قوموا بقي اطبعوا شوية مطبوعات ورقية وحطوا عليها رابط الموقع , أو اعمل اتصالاتك بكل اللى تعرفهم وبلغهم بعنوان Domain الموقع الجديد بتاعك . ما هو انا لو عندي موقع ومش بيظهر للناس اللي بتدور عليه في محرك البحث جوجل يبقي الغيه احسن , لا طبعا , مين قال كده , انت مشيت أول خطوة في النجاح , كمل , وهتوصل للي انت عايزة .

في ناس كتير غيرك لسه ما عملتش الخطوة الاولى في النجاح وهي تصميم موقع إلكتروني , انت سبقتهم , لكن عملت كده ووقفت , كمل مستني ايه . ابدأ إشهر موقعك علي شبكة الانترنت وسوقله , اقصد يعني اعمله سيو SEO . طيب يعني ايه سيو SEO ؟ هنشرحه بإذن الله في مقالات تانية بالتفصيل من الالف للياء , لكن بإختصار دلوقتي هو عبارة عن تطبيق عوامل ترتيب محركات البحث داخل وخارج موقعي عشان استوفي شروط محركات البحث وخوارزمياتها واطلع في اول النتائج لما يبحث عني أو عن منتجاتي وخدماتي عملائي . وحط تحت خدماتي ومنتجاتي دي 100 خط .

لأن في ناس كتير فاكره انها لما تكتب اسم شركتها في جوجل وتطلع يبقي كده هي سوقت واتشهرت وعملت سيو SEO كمان , لا أبدأ , ولا عملت حاجة , هو مين اصلا اللي يعرف اسم شركتك أو اللي بتقدمه , اللي بيبحث في جوجل بيبحث عن كلمات خاصة بالمنتج أو الخدمة اللي بتقدمها , وطبعا مستحيل تطلعله , وجرب كده وشوف .

فمتخليش حد يضحك عليك (وآسف في اللفظ) ويقولك أنا هصمملك الموقع واخليه يطلع فى جوجل كمان , وبعد ما يصمم الموقع يقولك اكتب في جوجل شركة كذا هيطلعلك موقعك , طيب ماهو لازم يطلع موقعك , ايه الابداع فى ده ؟ .

اسأل نفسك .... هي شركتك عالمية اوى كده عشان الناس تدور عليك بإسم الشركة ؟ طيب اللي بيدور علي خدماتك ومنتجاتك يلاقيك ازاى في جوجل ؟

وللأسف شركات كتير بتقدر تستغل جهل العملاء بمجال الانترنت والتصميم والبرمجة وتنتهز الفرصة دي عشان تقدر تحقق اعلى دخل مادي , بس الشركات دي عمرها قصير اوى مهما طال , الشركة اللي ملهاش مصداقية مع ربنا اولا ثم مع نفسها قبل العميل ما بتكملش كتير وبتقفل , وإن طال بيها الوقت لازم ييجي يوم وتقفل علي ما الضحايا كلهم يكتشفوا كذبهم ونصبهم .

ياريت نحاول نفهم قبل ما نتعامل مع اي حد وخاصة في مجال الانترنت , لأن المجال كبير اوى والمصلحات اكتر واكتر .

فنصيحتي للناس اللي لسه هتشتغل في مجال التسويق الالكتروني , إنهم يكون عندهم مصداقية وصراحة مع ربنا ثم نفسهم والعملاء , وضح للعميل كل حاجة بكل صراحة , ولو رفض يسمع اعتذر عن تقديم الخدمة , لإنك في الاخر اللي خسران .

أما نصيحتي لأصحاب المشاريع والمواقع , اسمعوا وافهموا من اكتر من شركة تسويق الكتروني , واسأل عن كل اللي انت عايز تفهمه , ولو ملقتش إجابة مقنعة شوف شركة تانية وثالثة ورابعة , لحد ما توصل لشركة تلاقي فيها المصداقية .

أتمني أكون قدرت أفيدكم , نسألكم الدعاء .